أحمد فؤاد نجم ... الشاعر البندقية

[elmorsy_2000]

احمد فؤاد نجم


[فقط الأعضاء المسجلين والمفعلين يمكنهم رؤية الروابط]

البطل الثائر ملهم الجماهير الفاجومي الشاعر الحبيب

حفظه الله وامد في عمره احمد فؤاد نجم

قال عنه الشاعر الفرنسي الكبير لويس اراجون

ان فيه قوه تسقط الاسوار

واسماه الدكتورعلي الراعي الشاعر البندقيه

الرئيس الراحل السادات يسميه الشاعر البذيء

ولقب بآخر الصعاليك المحترمين

وبشاعر تكدير الامن العام

من مواليد مصر شرقيه

1929 ولد عام

بسبب شعره سجن ثمانيه عشر عاما

[elmorsy_2000]

صرخة جيفارا

جيفارا مات
جيفارا مات
اخر خبر فى الراديوهات
وفى الكنايس
والجوامع
وفى الحواري
والشوارع
وع القهاوي وع البارات
جيفارا مات
واتمد حبل الدردشه
والتعليقات

مات المناضل المثال
ياميت خسارة على الرجال
مات الجدع فوق مدفعة جوه الغابات
جسد نضالة بمصرعه
ومن سكات
لا طبالين يفرقعوا
ولا اعلانات
ما رايكم دام عزكم
ياانتيكات
يا غرقانين فى المأكولات
والملبوسات
يا دافيانين
ومولعين الدفايات
يا محفلطين يا ملمعين
ياجيمسنات
( جمع لاسم جيمس بوند بالدارجة المصرية )
يا بتوع نضال اخر زمن
فى العوامات
ما رايكم دام عزكم
جيفارا مات
لاطنطنة
ولا شنشنه
ولا اعلامات واستعلامات

**
عينى عليه ساعه القضا
من غير رفاقه تودعه
يطلع انينه للفضا
يزعق
ولا مين يسمعه
يمكن صرخ من الالم
من لسعه النار ف الحشا
يمكن ضحك
او ابتسم
او ارتعش
او انتشى
يمكن لفظ اخر نفس
كلمه وادع
لجل الجياع
يمكن وصيه
للى حاضنين القضيه
فى الصراع
صور كتير
ملو الخيال
والف مليون احتمال
لكن
اكيد
اكيد
اكيد
ولاجدال
جيفارا مات
موتة رجال


ياشغالين ومحرومين
يا مسلسلين رجلين وراس
خلاص خلاص
مالكوش خلاص
غير بالبنادق والرصاص
دا منطق العصر السعيد
عصر الزنوج والامريكان
الكلمه للنار والحديد
والعدل اخرس او ****
صرخه جيفار يا عبيد
في اى موطن او مكان
مافيش بديل
مافيش مناص
يا تجهزوا جيش الخلاص
يا تقولوا على العالم خلاص

القاهرة 1968

[elmorsy_2000]

الممنوعات

ممنوع من السفر
ممنوع من الغنا
ممنوع من الكلام
ممنوع من إلاشتياق
ممنوع من إلاستياء
ممنوع من إلابتسام
وكل يوم فى حبك
تزيد الممنوعات
وكل يوم باحبك
أكتر من اللى فات
حبيبتي يا سفينه
متشوقه وسجينه
مخبر فى كل عقده
عسكر فى كل مينا
يمنعني لو أغير
عليكي أو أطير
إليكي واستجير
بحضنك
أو أنام
فى حجرك الوسيع
وقلبك ألربيع
أعود كما الرضيع
بحرقه الفطام
حبيبتي يا مدينه
متزوقه وحزينه
فى كل حاره حسره
وف كل قصر زينه
ممنوع من إني أصبح
بعشقك .. أو أبات
ممنوع من المناقشه
ممنوع من السكات
وكل يوم فى حبك
تزيد الممنوعات
وكل يوم باحبك
أكتر من اللى فات


القاهره / 1976

[elmorsy_2000]

رسالة رقم 1

عزة المشار اليها هي الفنانة عزة بلبع المغنية المعروفة وقد تزوجها الشاعر ايضا


كل ما تهل البشاير
من يناير كل عام
يدخل النور الزنازن
يطرد الخوف
والظلام
يا نسيم السجن ميل
ع الشجر وارمي السلام
زهر النوار
وعشش فى الزنازين .. الحمام
من سكون السجن
صوتي
نبض قلبي
من تابوتي
بيقولولك يا حبيبتي
كلمتي
من بطن حوتي
سلمى لي ع الحبايب
يا حبيبتي
سلمى لي
كل حب
وله نصيبه من سلامي
بلغي لي
احضنى العالم عشاني
بين عيونك
وابعتى لي
نظره
منها اشوف حبايبي
واشفي قلبي
واساليلي
كل عالم فى بلدنا
كل برج وكل مادنة
كل صاحب من صحابنا
كل عيل من ولادنا
حد فيهم شاف علامه
من علامات القيامه
قبل ما تهل البشاير
يوم تمنتاشر يناير
لما قامت مصر قومه
بعد ما ظنوها
نومه
تلعن الجوع والمذله
والمظالم
والحكومه ؟
سلمى لي ع الولاد السمر
خضر العمر
فى عموم الحواري
سلمي لي ع البنات
المخطوبين فى المهد
لسرير الجواري
واساليلي بالعتاب
كل قاري فى الكتاب
حد فيهم
كان يصدق
بعد جهل
بعد موت
ان حس الشعب يسبق
واي صوت
هى دي مصر العظيمه
ياحبيبتي
هى مصر
اللي فضلتى ف هواها
عشنا
على الف قصر
هى دي يا عزة
مصر

معتقل طره / يناير 1977

[elmorsy_2000]

بهيـة

يسبق كلامنا سلامنا يطوف ع السامعين معنا
عصفور محندق يزقزق كلام موزون و له معنى
عن الارض سمرا و قمرا
و ضفه و نهر و مراكب
و رفاق مسيرة عسيرة
و صورة حشد
و مواكب
ف عيون صبية بهية
عليها الكلمة و المعنى

***
مصر يا امّة يا بهية
يام طرحة و جلابية
الزمن شاب و انتي شابة
هو رايح و انتي جاية
جايه فوق الصعب ماشية
فات عليكي ليل و مية
و احتمالك هو هو
و ابتسامتك هي هي
تضحكي للصبح يصبح
بعد ليلة و مغربية
تطلع الشمس تلاقيكي
مع****ية و صبية
يا بهية

***
الليل جزاير جزاير
يمد البحر يفنيها
و الفجر شعلة ح تعلا و عمر الموج ما يطويها
و الشط باين مداين
عليها الشمس طوافة
ايدك في ايدنا
ساعدنا
دي مهما الموجة تتعافى
بالعزم ساعة جماعة
و بالأنصاف نخطيها

***
مصر يا امّة يا سفينة
مهما كان البحر عاتي
فلاحينيك ملاحينيك
يزعقوا للريح يواتي
اللي ع الدفة صنايعي
و اللي ع المجداف زناتي
و اللي فوق الصاري كاتب
كل ماضي و كل آتي
عقدتين و التالته تابتة
تركبي الموجة العفية
توصلي بر السلامة
مع****ية و صبية.. يا بهية

***
و يعود كلامنا في سلامنا يطوف ع الصحبة حلواني
عصفور محني يغني
على الأفراح ومن تاني
يرمي الغناوي تقاوي
تبوس الأرض
تتحنى
تفرح
و تطرح
و تسرح
و ترجع تاني تتغنى
اللي بنى مصر كان في الأصل حلواني

[elmorsy_2000]

بيان هام


( تقليدا لخطب انور السادات كتب احمد فؤاد نجم هذه القصيدة مقلدا صورته وحركاته وتسببت في رفع قضية ضده بتهمة سب وقذف موظف عام صفتة رئيس الجمهورية واطلاق صفة عليه وحين ترافع السيد احمد نبيل الهلالي محامي الحزب الشيوعي المصري عن نجم علل القاضي التهمة بان الشاعر استخدم " لازمة " السادات في خطاباته للتشهير به فرد المحامي النابة " طب بذمتك يا سيادة القاضي الريس بتاعنا ليه لازمة ؟ " ولقبه الشاعر بشحاتة المعسل والمعسل لا تعني ذو الطعم السكري بقدر ما تعني المعسل تبع الشيشة وخلافه
هنجف = كلمة اشتقاقية من كلمتي عنب و نجف والاثنتان تعبران عن تمام الشيء على أكمل وجة -
مراسح = لفظة مقلوبة مستخدمة للتندر على المسارح -
- شبندر = اشتقاق اخر من شهبندر و هو رئيس الطائفة من السوق في مصر المملوكية
- جراسن = جمع اشتقاقي لجرسون بالفرنسية وهو النادل او القائم باعمال الخدمة في صالونات القمار - - صهين تفلعص = صهين بعنى الطناش الفلعصة هي الحركة التي يقوم بها القرموط للإنزلاق من يد الصياد والدخول في طين الترع والمصارف مرة أخرى بفضل انسيابيته ولزوجة الطين )

هنا شقلبان
محطه إذاعه حلاوه زمان
من القاهرة
ومن كردفان
وسائر بلاد العرب
واليابان
ومن فنزويلا
وايضا ايران
ومن أي دار
او بلد مستباحه
بفعل السياحه
مع الامريكان

هنا شقلبان
محطه اذاعه حلاوه زمان
نقدم اليكم بكل اللغات
مراسح وسيما وجميع الفنون
صحافه ومنابر
وتليفويونات
وخطبا ف جوامع
وجبنه وزيتون

ونقزح ونركب جميع الموجات
ونبحث ونفهم
فى كل الشئون
وديما نلعلع فى كل الحالات
ولا حد سامع
ولا يحزنون

وتمسع ما تسمع
دا ما يهمناش
لان احنا اصلا
بناكل بلاش
فخليك فى نفسك
وما نخليناش
نسلط عليك القلم
واللسان

هنا شقلبان
محطه اذاعه حلاوه زمان
يسر الاذاعه
وما يسركوش
بهذي المناسبه
وما بندعيكوش
نقدم اليكم
ولا تقرفوش
شحاته المعسل
بدون الرتوش

شبندر سماسره بلاد العمار
معمر جراسن للعب القمار
وخارب مزارع
وتاجر خضار
وعقبال املتك
امير الجيوش
ما تقدرش تنكر
تقول ما اعرفوش
ما تقدرش ايضا
تقول ما اسمعوش
شحاته المعسل
حبيب القلوب
يزيل البقع
والهموم والكرب
يأنفس
يأ فين
يبلغ حبوب
ويفضل يهلفط
ولا تفهموش
وتفهم ما تفهم
دا ما يهمناش
لان انت فاهم
وعامل طناش
ح تنكر وتحلف
ح اقول لك بلاش
ح تتعب دماغنا
وتتعب كمان
هنا شقلبان
محطه اذاعه حلاوه زمان
لان المخبى ظهر واستبان
وكل المسائل
بدت للعيان
وطلعت حكاوي
ونزلت كمان
عن التهريبية
وعن كيت وكان
وعن محسوبيه
وعن العبان
ظهر فى المدينه
كانه الطوفان
وغرّق مراكب
وسوح غيطان
وبعض المراكب
ح تغرق كمان
وازمه مساكن
وازمه امان
وعالم بياكل
فى عالم جعان
وريحه مؤامره
فى جو المكان
مخطط خيانه
مع الامريكان
لدبح العشيره
وحرق الجيران
وفيه ناس بترغي
ولازم بيان
كما ابلغونا
جميع الودان
لهذا وذاكا ... وتكلم كمان
نقدم اليكم
عروسه وحصان
شحاته المعسل
وهذا البيان

هنا شقلبان
محطه اذاعه حلاوه زمان
بسم الله
سلامٌ عليكم
وسلمون وموز
واما المسائل
فهنجف ولوز
فيا اخوتى
ويا اخوات
اليكم بيانى
كما هو ات :

جميع المسائل
تمام التمام
وكل الكلام دا
مجرد كلام
فصبرا جميلا
ولا تقلقوش
وشغل الضغاين
انا ما اقبلوش

ما فيش أي حاجه !
على الطلاق والعتاق بالتلاته
ما فيه أي حاجه !
وقّـّدر كمان ان فيه أي حاجه
ما فيش أي حاجه
ما لوش أي لازمه الكلام
واللجاجه
وعيب ان عيل يسوق السماجه
ويعمل ديباجه

انا بطبعي ضد السماسره الكبار
بحكم المنافسه
وحكم الجوار
لكن مش ف الطبيعي
انى اعمل فضيحه
لو احد زميلي
هبش كام صفيحه

ما كل الزمايل
بتهبش صفايح
وكل اللي جاي
مش زي اللي رايح
فيا ايها الشعب
صهين تفعلص
مساء التنفس
مساء الرويح

اخويا الامير بزرميط الايرانى
بعت لي السنه دي
عزمنى ودعانى
انا قبلت طبعا
ورحنا العزومه
وكانت وليمه
ما تحصلش تانى
دا ايه المحمر
وايه المكمر
وايه المشمر
وايه الصوانى
انا دماغى تعبت
ولفت صراحه
من الفخفخه
والهنا الاصفهانى
هناك يعنى مثلا
اذا شربت طافيه ( نوع مهبب من الخمور يدعى منقوع البراطيش ايضا )
تمز بكوارع
وبسطرمه ضانى

ما شفتش هناك
ناس بتحقد عليهم
ولا ناس بتشتم
فلان الفلانى
لانه اشتري عزبيتن
من شطارته
وحكمة ادارته
وطلّع مبانى

وبعد الواليمه استلمنا الهدايا
مفضض
ومدهب
وقز وقيشانى
وطبعا اخويا الامير
قال لى حاجه
ح اقوالها لكو طبعا
اذا الوقت ناسب
ح يطلع لى عيل
بدون أي حاجه
ويعمل لى فلحص
ويقعد يحاسب
دا حقد اشتراكى انا ما اقبلوش
ولو هو ابنى انا ما اعتقوش
كلام عن سماسره
كلام عن دعاره
حاجات مش صحيحه
جمل مستعاره
وعايزين يخلوا البلد
اردغانه ( اردغانة بمعنى ماخور شعبي )
وعايزين اسيب البلد
من زمان

وانا مش ح اسلم
واسيب الامان
ولابالبوليس والنيابه كمان
فيا ايها الشعب
كمل جميلك
وصبرا
واذلم حتيجى المصاري ( اذلم = اذا لم )
وتاكل وتشرب
تبع ما ياتيك
وتغرق فى بحر العبيد والجواري
وترسم حياتك
حسب ما يرائيتك
وتملا الحواري
فساقى وقصاري
تسبح بحمدك
وتشكر جميلك
وفضل الزباله
وطفح المجاريه
ختاما سلاما
واخر كلاما
ضرورا
يسود الهدوء والوئاما
فماذا والا
ح طربقها واللا
اهرب فلوسي
واسافر قواما
سلام عليكم
وسلمون وموز
بصفتى رئيسا
وابا
وجوز

[elmorsy_2000]

رجعوا التلامذه

رجعوا التلامذة

يا عم حمزة للجد تاني

يا مصر إنتي اللي باقية

و انتــــــــــي

قطف الأماني

لا كورة نفعت

و لا أونطة

و لا المناقشة و جدل بيزنطة

و لا الصحافة و الصحفجية

شاغلين شبابنا

عن القضيـــة

قيمولنا صهبة يا صهبجية

و دوقونا طعم الأغاني

رجعوا التلامذة

للجد تـــــــاني



طلعوا التلامذة ورد الجناين

اسمع يا ميلص و شوف و عاين

ملعون أبوك ابن كلب خاين

يا صوت أميركا

يا أمريكانـــــــي

رجعوا التلامذة يا عم حمزة

للجد تانــــــــــي

يا مصر إنتي اللي باقية و انتــــــــــي

قطف الأمانــــي

[elmorsy_2000]

الأولة بلدي

الأولة بلدي

و الثانية بلدي

و الثالثة بلدي

الأولة بلدي باسلطن جو موالي و دا الموصوف

و الثانية بلدي باقول الكلمة بالعالي و ع المكشوف

و الثالثة بلدي ياكنزي و عزوتي و مالي و ملو الشوف



الأولة بلدي باسلطن جو موالي و دا الموصوف

دوا العيــــــــــــــــــــان

و الثانية بلدي باقول الكلمة بالعالي و ع المكشوف

و ف المليـــــــــــــــان

و الثالثة بلدي ياكنزي و عزوتي و مالي و ملو الشوف

آوانـــــــــــــــــــــك آن



تحدي الحد يا بلدي

ما بين الحق و البهتان

و رايتك تعلا يا بلدي

دليل عن صحة البنيان

و دا الموصوف

و الاولة بلدي

و الثانية بلدي
و الثالثة بلدي

القاهرة 1968

[elmorsy_2000]

موال الفول واللحمة

:D:D:D:D:D


عن موضوع الفول واللحمة صرح مصدر قال مسئول
ان الطب اتقدم جدا والدكتور محسن بيقول
ان الشعب المصري خصوصا من مصلحته يقرش فول
حيث الفول المصري عموما يجعل من بني ادم غول
تأكل فخده في ربع زكيبه والدكتور محسن مسئول
يديك طاقة وقوة عجيبة تسمن جدا تبقى مهول
ثم اضاف الدكتور محسن ان اللحمه دي سم أكيد
بتزود أوجاع المعدة وتعود على طولة الايد
وتنيم بني ادم وتفرقع منه المواعيد
واللي بياكلوا اللحمة عموما حيخشوا جهنم تأبيد
يادكتور محسن يامزقلط يامصدر ياغير مسئول
حيث ان انتو عقول العالم والعالم محتاج لعقول
مارأى جنابك وجنابهم فيه واحد مجنون بيقول
احنا سيبونا نموت باللحمة وانتو تعيشوا وتاكلوا الفول
مارأيك ياكابتن محسن مش بالذمة كلام معقول


:D:D:D

[hannona]

شكرا يا احمد هو فعلا بحس انه انسان شعبى بيتكلم بالمنطق العام

[elmorsy_2000]

شكرا يا احمد هو فعلا بحس انه انسان شعبى بيتكلم بالمنطق العام

ردك أعاد لي ذكري حلوة .. لا حرمني الله منها ...

[hannona]

ما هى هذه الذكرى بجى هههه

[الفارس الأبيض]

احمد نجم هو صوت كل انسان لا يريد اخراج صوته والبوح بما فى داخله

ويكفى انه وفى خضم هذه الشهرة العارمة

مازال يقطن سطوح احد المنازل .... فى شقة عادية جدا

والكارثة هى نزاع المالك على هذه الشقة مع الشاعر احمد نجم ... وتهديده له بالطرد

وعجبى

وتسلم الايادى يا احمد باشا ... على ما جلبته لنا من جميل الكلمات

[elmorsy_2000]

ما هى هذه الذكرى بجى هههه

أنتي فكرتيني بإنسانه .. من أعز البشر علي نفسي .. لا انا الحمد لله مش بنساها عشان حد يفكرني بيها بس تشابه الأسلوب هو اللي فكرني بأسلوبها ربنا يخليهالي إن شاء الله

[hannona]

ربنا يخليهالك ان شاء الله

[artman]

جميل الموضوع
بس اعتقد انك ناوي تحط اغلب اعماله
انا دخلت لما حنان دخلت
ههههههههه
تقدر تعدل يا مدير

[elmorsy_2000]

احمد نجم هو صوت كل انسان لا يريد اخراج صوته والبوح بما فى داخله

ويكفى انه وفى خضم هذه الشهرة العارمة

مازال يقطن سطوح احد المنازل .... فى شقة عادية جدا

والكارثة هى نزاع المالك على هذه الشقة مع الشاعر احمد نجم ... وتهديده له بالطرد

وعجبى

وتسلم الايادى يا احمد باشا ... على ما جلبته لنا من جميل الكلمات

بوجي باشا والله انت منور منتدي الشعر .. متديها جوله كده في منتدي الشعر:D

[hannona]

الف مبروك يا شريف على القلم المميز

[elmorsy_2000]

ربنا يخليهالك ان شاء الله

يـــــــــــــارب

[elmorsy_2000]

جميل الموضوع
بس اعتقد انك ناوي تحط اغلب اعماله
انا دخلت لما حنان دخلت
ههههههههه
تقدر تعدل يا مدير


ما يخالف ياباشا.. إحنا نحييك علي الحضور وتبقي تتدبر في باقي اعمال احمد فؤاد نجم..

[artman]

الف مبروك يا شريف على القلم المميز

الله يخليكي يا حنان اتفضلي
:):):)

[artman]

شوف دا يا احمد
قصيدة مغناه لاحمد نجم

[فقط الأعضاء المسجلين والمفعلين يمكنهم رؤية الروابط]

[elmorsy_2000]

شوف دا يا احمد
قصيدة مغناه لاحمد نجم

[فقط الأعضاء المسجلين والمفعلين يمكنهم رؤية الروابط]



مين ده ياباشا الشيخ إمام .. الحقيقه مش قادر أتبين الكمات قوي بس صوت المطرب روعه ..من مطربي الأصاله

[artman]

هي عموما قصيدة من قصائد احمد فؤاد نجم
وكويس انها عجبتك

[elmorsy_2000]

هي عموما قصيدة من قصائد احمد فؤاد نجم
وكويس انها عجبتك


عجبتني جداً ياباشا لدرجه انها اشتغلت تقريبا خمس مرات مكنتش بالي انها بتخلص..;)